पुणे : ‘असोसिएशन ऑफ ओरल अँड मॅक्सिऑफिशियल सर्जन्स ऑफ इंडिया’च्या सुवर्णमहोत्सवानिमित्त महाराष्ट्र कॉस्मोपॉलिटन एज्युकेशन सोसायटीच्या रंगूनवाला डेंटल कॉलेजतर्फे मुख कर्करोग आणि हेल्मेट वापराविषयी जनजागृती मोहीम, तसेच मशाल पदयात्रा आयोजित करण्यात आली होती. याचे उद्घाटन सावित्रीबाई फुले पुणे विद्यापीठाचे कुलगुरू डॉ. नितीन करमळकर यांनी केले.
हा कार्यक्रम आझम कॅंपसमधील एम. ए. रंगूनवाला डेंटल कॉलेज येथे झाला. कार्यक्रमाच्या अध्यक्षस्थानी महाराष्ट्र कॉस्मॉपॉलिटन एज्युकेशन सोसायटीचे अध्यक्ष डॉ. पी. ए. इनामदार होते. ओरल अँड मॅक्सिलोफेशियल सर्जरी विभागाचे प्रमुख डॉ. जे. बी. गारडे यांनी कुलगुरूंना रंगूनवाला डेंटल हॉस्पिटलमध्ये सुरू असलेल्या मुख कर्करोगविषयक संशोधनाची आणि हेल्मेट नसल्याने झालेल्या अपघातग्रस्तांवर केलेल्या शस्त्रक्रियांची माहिती दिली.
‘रंगूनवाला डेंटल हॉस्पिटलमध्ये सुरू असलेल्या मुख कर्करोगविषयक संशोधनाला आंतरराष्ट्रीय सहयोग मिळावा, यासाठी सावित्रीबाई फुले पुणे विद्यापीठ प्रयत्न करेल,’ असे आश्वासन डॉ. करमळकर यांनी या प्रसंगी दिले.
या वेळी लतीफ मगदूम, प्राचार्य रमणदीप दुग्गल, डॉ. हर्षद भागवत, डॉ. सोनी, डॉ. गौरव खुटवड, डॉ. अश्विनी वडणे उपस्थित होते. मुख कर्करोगविषयक जनजागृतीसाठी कॉलेजच्या विद्यार्थ्यांनी ‘ये पान हमे इस मोड पे ले आया’ हे पथनाट्य सादर केले. कुलगुरूंनी त्यांचे कौतुक केले.